ရှေးမြန်မာစာပေများတွင်တွေ့ရသော အနက်တူရုပ်သွင်ကွဲ စကားလုံးများ

ဘာသာစကားအများစုတွင် အရေးဘာသာစကား (Writing Language) နှင့် အပြောဘာသာစကား (Spoken Language) ဟူ၍ ရှိပါသည်။ အပြောဘာသာ စကားတွင် အနက်တူရုပ်သွင်ကွဲ (Synonym) စကားလုံးများများစွာ ရှိပါသည်။ နေ့စဉ်သုံးစကားများတွင်တွေ့ရသော အနက်တူရုပ်သွင်ကွဲ စကားအချို့ကို အနည်းငယ်ဖော်ပြ လိုပါသည်။ ယင်းတို့မှာ-
အဖေ နှင့် ဖခင်
ဆရာ နှင့် အာစရိ
ဇနီး နှင့် မယား
ခမ်းနား နှင့် ထည်ဝါ
ဆင်းရဲ နှင့် ဒုက္ခ
ငွေကြေး နှင့် ပိုက်ဆံ
စသည်တို့ဖြစ်ကြသည်။
စာပေများတွင်လည်း အနက်တူ ရုပ်သွင်ကွဲစကားလုံးများကို တွေ့ရှိရပါသည်။ အများက စိတ်ဝင်စားသော၊ အသုံးတွင်ကျယ်သော အကြောင်းအရာများတွင် အနက်တူ ရုပ်သွင်ကွဲ ပိုများကြောင်းတွေ့ရသည်။ ရှေးကရေးဖွဲ့သော ပျို့၊ မော်ကွန်း၊ ဧချင်း စသည့်ကဗျာများ တွင် မိဖုရား၊ သူရဲကောင်းတို့ကို ရည်ညွှန်းသော အနက်တူရုပ်သွင်ကွဲ များစွာ တွေ့ရသကဲ့သို့ ရတုများ တွင်လည်း ရတုအဖွဲ့ခံမယ်ကလေးကို ရည်ညွှန်းသော အနက်တူရုပ်သွင်ကွဲများစွာ တွေ့ရသည်။ အနက်ချင်း ထပ်တူကျသည့် အနက်တူရုပ်သွင် ကွဲစစ်စစ်မှာ မရှိဟူသောအဆိုအတိုင်း ထိုစကားလုံးများသည် တစ်စိတ်တစ်ပိုင်းသော်လည်းကောင်း၊ နီးနီးစပ်စပ်သော်လည်းကောင်း အနက်တူသော ရုပ်သွင်ကွဲများဖြစ်သည်။
အနက်တူရုပ်သွင်ကွဲ စကားလုံးများကို တစ်ခါတစ်ရံ တွဲစပ်သုံး နှုန်းတတ်ကြသည်။ ထိုသို့ တွဲစပ်သုံးခြင်းဖြင့် အဓိပ္ပာယ်ကို ထူးခြားလေးနက်စေနိုင်ကြောင်း တွေ့ရ သည်။ “ဆင်းရဲဒုက္ခ” ၊ “ပူပင်သောက” ၊ “အကျင့်သီလ”၊ “နေရာဌာန”၊ “အရိပ် အာဝါသ” စသည်ဖြင့် အနက်တူရုပ်သွင်ကွဲများကိုတွဲသုံးသည့်အလေ့ ရှိကြသည်။ ထိုသို့ တွဲသုံးခြင်းသည် လုံးချင်းသုံးသည်ထက် ပို၍လေးနက်ထိမိသည်ဟု ယူဆကြကြောင်း တွေ့ ရပါသည်။ ထိုသဘောကို ဆရာကြီးဒေါက်တာ ခင်အေးက “အတ္တဗေဒ နိဒါန်း” တွင် အောက်ပါအတိုင်း ဖော်ပြထားပါသည်။
စာပေများတွင် အနက်တူ ရုပ်သွင်ကွဲများကို စကားပရိယာယ်ဟု ခေါ်သည်။ စကားပရိယာယ်ကို အစုလိုက်သုံးခြင်းဖြင့်စာကို လေးနက်ခံ့ညားစေသည်ဟု ယူဆကြ သည်။ မဟာမင်းလှမင်းခေါင်ကျော်၏ ဥမ္မာဒန္တီပျို့ အပိုဒ် (၇၂) တွင် “သည်မျိုးလည်းမှန်၊ သည်ရန် လည်းတွင်၊ သည်ပင်လည်း မည်၊ ဆွေသည်လည်းသွင်၊ သည်ရင်းသည်လျာ၊ စောဥမ္မာကို” ဟူသောအဖွဲ့တွင် “ဇနီး” ဟုအဓိပ္ပာယ်ရသော စကားပရိယာယ် (၆) လုံး တွဲ၍ သုံးထားပုံကို တွေ့ရသည်။
အထက်ပါ ဥမ္မာဒန္တီပျို့တွင် တွေ့ရသော “သည်မျိုး၊ သည်မှန်၊ သည်ပင်၊ ဆွေသည်၊ သည်ရင်း၊ သည်လျာ” တို့သည် “ဇနီး” ဟူသော စကားလုံး၏ အနက်တူရုပ်သွင်ကွဲများ ဖြစ်ပေသည်။ ထိုသို့ တစ်ဦးတစ်ယောက်တည်းကို အနက်တူရုပ်သွင်ကွဲ စကားလုံးများဖြင့် အမျိုးမျိုးရေး ဖွဲ့ပြနိုင်ခြင်းသည် ရှေးစာဆိုတို့၏ စကားလုံးကြွယ်ဝပုံ၊ စကားပရိယာယ်ကြွယ်ဝပုံကို ဖော်ပြနေပေသည်။ ထို့အတူ ရှေးမြန်မာစာပေများတွင် တွေ့ရသော အနက်တူရုပ်သွင်ကွဲ စကားလုံးများကို လက်လှမ်းမီသရွေ့ လေ့လာတင်ပြပါမည်။ အင်းဝခေတ်စာဆို ရှင်မဟာ ရဋ္ဌသာရရေးဖွဲ့သော ဘူရိဒတ်လင်္ကာကြီးတွင် မင်းသားနှင့် နဂါးမ တွေ့ဆုံပေါင်းဖက်ခန်း၌ နဂါးမတစ် ဦးတည်းကို ရည်ညွှန်းရေးဖွဲ့သော အနက်တူရုပ်သွင်ကွဲ စကားပရိယာယ်များကို အောက်ပါအတိုင်း တွေ့ရှိရပါသည်။
“နုမျစ်ရောင်လှ၊ နဂါးမ”
“စိမ်းခြေရောင်မြ၊ နဂါးမ”
“ချစ်ဖွယ်စံပ၊ နဂါးမ”
“ရောင်ကောင်းရုပ်သွင်၊ မိနတ်ရှင်”
“ကျစ်လျစ်စံပ၊ နဂါးမ”
“ဆေးလေးလျောက်ပတ်၊ မိရေနတ်”
အထက်ပါ စကားပရိယာယ်များသည် နဂါးမ၏ လှပတင့်တယ်ပုံ၊ ချစ်မြတ်နိုးဖွယ်ကောင်းပုံ၊ စိမ်းမြသော အရောင်ရှိပြီး ရေ၌ ပျော်ပါးနေထိုင်ပုံတို့ကို ဖော်ညွှန်းနေသော အနက်တူရုပ်သွင်ကွဲများ ဖြစ်သည် ကို တွေ့ရပေသည်။ ထိုစကား ပရိယာယ်များသည် တစ်ခုနှင့်တစ်ခု တစ်စိတ်တစ်ပိုင်းသော် လည်းကောင်း၊ နီးနီးစပ်စပ်သော်လည်းကောင်း တူညီသည့် အနက်တူရုပ်သွင်ကွဲများဖြစ်ကြောင်း လေ့လာတွေ့ ရှိရသည်။
အဆိုပါ ဘူရိဒတ်လင်္ကာကြီးတွင်ပင် မင်းသားနှင့်နဂါးမ တွေ့ဆုံပေါင်းဖက်ခန်း၌ အိမ်ရှေ့မင်းသားကို ရည်ညွှန်းရေးဖွဲ့ထားသည့် အနက်တူရုပ်သွင်ကွဲ စကားပရိယာယ်များကိုလည်း အောက်ပါအတိုင်း တွေ့ရှိရပါသည်။
“မင်းလျာရည်ထင်၊ စောလုလင်”
“ဥပရာဇာ၊ စောမင်းလျာ”
“အိမ်ရှေ့သခင်၊ စောရဲထင်”
“ရွယ်ဆင်းကျိုင်းထွား၊ မင်းကြီးသား”
“အိမ်ရှေ့ရာဇာ၊ စောမင်းလျာ”
“နတ်ရှင်ရင်နှစ်၊ ဥပရာဇ် “
အထက်ပါစကားပရိယာယ်များမှာ အိမ်ရှေ့မင်း၏ ရုပ်ဆင်းအင်္ဂါတင့်တယ်ပုံ၊ မင်းလောင်းမင်းလျာဖြစ်ပုံတို့ကို ဖော်ညွှန်းနိုင်သော အနက်တူရုပ်သွင်ကွဲများဖြစ်သည်ကို တွေ့ရပေသည်။ ထိုစကား ပရိယာယ်များသည် တစ်ခုနှင့်တစ်ခု တစ်စိတ်တစ်ပိုင်းသော်လည်း ကောင်း၊ နီးနီးစပ်စပ်သော်လည်း ကောင်း တူညီသည့် အနက်တူရုပ် သွင်ကွဲများဖြစ်ကြကြောင်း တွေ့ရှိရပါသည်။ တောင်ငူခေတ် စာဆိုတော် နတ်ရှင်နောင်ရေးဖွဲ့သော ရတုများတွင်လည်း ရာဇဓာတုကလျာအား ရည်ညွှန်းဖွဲ့ဆိုသော အနက်တူရုပ် သွင်ကွဲ စကားပရိယာယ်များကို အောက်ပါအတိုင်းတွေ့ရှိရပါသည်။
“လှခေါင်ထွတ်”
“လှဆုံးတင့်”
“လှမှန်ကင်း”
“လှငြိမ့်လေး”
အထက်ပါ စကားပရိယာယ်များမှာ ဓာတုကလျာ၏ လှပတင့်တယ်ပုံကို ဖော်ညွှန်းနိုင်သော စကားလုံးများဖြစ်ကြပြီး တစ်ခုနှင့်တစ်ခု တစ်စိတ်တစ်ပိုင်းသော် လည်းကောင်း၊ နီးနီးစပ်စပ်သော် လည်းကောင်း တူညီသည့်အနက်တူ ရုပ်သွင်ကွဲများဖြစ်ကြောင်း လေ့လာတွေ့ရှိရသည်။
ကုန်းဘောင်ခေတ်စာဆို လက်ဝဲသုန္ဒရ ရေးဖွဲ့သည့် “ဖယောင်း အိသွင်ခွေလိမ့်မည်” ဟူသော ကုန်းဘောင်မြို့ရှိ ဝန်ကတော်ထံပေး ကျေးစေရတု၌လည်း ဝန်ကတော်ကို ရည်ညွှန်းသည့် အနက်တူရုပ်သွင်ကွဲ စကားပရိယာယ်များကို အောက်ပါအတိုင်း တွေ့ရှိရပါသည်။
“အသက်ဝေဘော်”
“သက်ဝေငယ်ပေါင်း”
အထက်ပါ စကားပရိယာယ် များမှာ စာဆိုလက်ဝဲသုန္ဒရကဝန် ကတော်အပေါ် ချစ်မြတ်နိုးပုံ ဖော်ညွှန်းပြဆိုနေပြီး တစ်ခုနှင့်တစ်ခု တစ်စိတ်တစ်ပိုင်းသော်လည်းကောင်း၊ နီးနီးစပ်စပ်သော်လည်းကောင်း တူညီသည့် အနက်တူရုပ်သွင်ကွဲများဖြစ်ကြောင်း တွေ့ရှိရသည်။
ကုန်းဘောင်ခေတ်စာဆို ဝက်မစွတ်နဝဒေး၏ “အာသံနိုင် မော်ကွန်း”တွင်လည်း ဘကြီးတော်ဘုရား ဘုရင်မင်းမြတ်ကိုရည်ညွှန်းသည့် အနက်တူရုပ်သွင်ကွဲ စကားပရိယာယ်များကို အောက်ပါအတိုင်း တွေ့ရပါသည်။
“ပရမေရန်ဆွတ်၊ တို့စောထွတ်”
“ဝှန်ဝါဝင်းညီး၊ ပူးမင်းကြီး”
“သတိုးဓမ္မရာဇ်၊ တို့ရှင်ချစ်”
“ပြောင်ခိုင်မုန်ဝင်၊ ဆဒ္ဒန်ရှင်”
အထက်ပါ စကားပရိယာယ်များမှာ ဘကြီးတော်ဘုရား၏ ရန်အပေါင်းကို ဖြိုဖျက်နိုင်ပုံ၊ ဆင်ဖြူရှင်ဖြစ်ပြီး ဘုန်းတန်ခိုးကြီးမားပုံတို့ကို ဖော်ညွှန်းနေပေသည်။ ယင်းတို့သည် ဘကြီးတော်ဘုရားကို ရည်ညွှန်းသည့် တစ်ခုနှင့်တစ်ခု တစ်စိတ်တစ်ပိုင်းသော်လည်းကောင်း၊ နီးနီးစပ်စပ်သော်လည်းကောင်း တူညီသည့် အနက်တူ ရုပ်သွင်ကွဲများဖြစ်ကြသည်။ ထိုသို့ စာပေများတွင်တွေ့ရသော အနက်တူရုပ်သွင်ကွဲများကို စကားပရိယာယ်များဟု ခေါ်ဆိုကြသည့်အတိုင်း စာအဖွဲ့ခံပုဂ္ဂိုလ်တစ်ဦးတည်းကို စကားပရိယာယ်အမျိုးမျိုး သုံးကာ ရေးဖွဲ့ဖော်ပြခြင်းဖြင့် ထို ပုဂ္ဂိုလ်၏ ဂုဏ်အမျိုးမျိုးမှာ ထင်ရှား ပေါ်လွင်လာသည်။ ထို့အပြင် စာဆို ၏ အရေးအဖွဲ့စွမ်းရည်မှာ ပေါ်လွင်လာပြီး ရေးဖွဲ့သည့်စာကိုလည်း လေးနက်ခံ့ညားစေကြောင်း တွေ့ရသည်။
ဒေါက်တာမာလာ
ကျမ်းကိုးစာရင်း-
ခင်အေး၊ ဒေါက်တာ၊ ၂ဝဝ၄။ အတ္တဗေဒ နိဒါန်း။ ရန်ကုန်၊ ပညာတန်ဆောင်။
Palmer, F.R. 1976. Semantics. Cambridge: C.U.P.
Credit; Popular မှကူးယူဖော်ပြသည်။


(မှတ်ချက် - စာရေးဆရာများ၏ အရေးအသားနှင့် သရုပ်ဖော်ထားသောပုံများ ပြောင်းလဲသွားပါက စာဖတ်သူတို့ ခံစားမှုရသလျော့နည်းသွားမည်စိုး၍ Asian Fame Media Group မှထုတ်ဝေသော ပေါ်ပြူလာဂျာနယ်ပါဖော်ပြချက်များအတိုင်း ကူးယူဖော်ပြရခြင်းဖြစ်ပါသည်။ ပေါ်ပြူလာဂျာနယ်၏ အောင်မြင်နေမှုကို နင်း၍ အောင်ပွဲခံလိုခြင်းမဟုတ်ပါကြောင်းကို စာရေးဆရာများ၊ Asian Fame Media ကုမ္ပဏီမှတာဝန်ရှိသူများနှင့် အယ်ဒီတာများကို ရိုသေစွာအသိပေးအပ်ပါသည်။)