မြန်မာနိုင်ငံက Facilities နဲ့ဟောလီးဝုဒ်ကလူတွေကို ရိုက်ခိုင်းကြည့်ရင် မြန်မာကားလိုမျိုးထွက်လာဖို့နေနေသာသာ ရူးပြီးတောင်ပြန်သွားဦးမယ်လို့ပြေတီဦးဖွင့်ဟ

  လက်ရှိမှာဆိုရင် ဖေ့စ်ဘွတ်လူမှုကွန်ယက်ပေါ်မှာ မြန်မာပေါကားများရပ်ဆိုတဲ့ Page ကနေ မြန်မာကားတွေရဲ့လိုအပ်ချက်၊ လိုအပ်မှုတွေကို မီးမောင်းထိုးပြနေတာ အားလုံးသိရှိပြီးသားဖြစ်မှာပါ။ ဒါကိုအချို့အချို့သောရုပ်ရှင်လောကသားတွေက ဝေဖန်မှုတစ်ခုအနေနဲ့လက်ခံသလို တချို့ကလဲ မကျေမနပ်ဖြစ်နေကြတာကိုလဲ တွေ့ကြမှာပါပဲ။ ဒီအကြောင်းအရာနဲ့ပတ်သက်ပြီး ခုလက်ရှိ မြန်မာနိုင်ငံရဲ့ ထိပ်တန်းအနုပညာရှင်တွေထဲက တစ်ယောက်ဖြစ်တဲ့ အကယ်ဒမီများရှင် ပြေတီဦးကိုသွားရောက်မေးမြန်းဖြစ်ခဲ့ပါတယ်။ ပြေတီဦးရဲ့ လူမှုကွန်ယက်ပေါ်ကမြန်မာကားများအပေါ်ဝေဖန်မှုများနဲ့ပတ်သက်ပြီး အဓိကအကြောင်းအရာများကို ဖြည့်စွက်ပြောပြလာသလို လက်ရှိမှာရိုက်ကူးနေတဲ့ ရုပ်ရှင်ကားကြီးအကြောင်းကိုလဲ ပြည့်စုံစွာပြောပြလာတဲ့အခါ

-အခုဆိုရင် လူမှုကွန်ယက်ပေါ်မှာ မြန်မာပေါကားများရပ်ဆိုတဲ့ Page လေးကနေ မြန်မာကားတွေကို ဝေဖန်နေတာမျိုးတွေလဲရှိတယ်ပေါ့။ အဲ့ဒီအပေါ် အစ်ကို့အမြင်လေးကိုလဲသိချင်ပါတယ်။

ဝေဖန်တယ်ဆိုတာကတော့ အခုမှစဖြစ်လာတာ မဟုတ်ဘူးလေ။ အခုလဲရှိတယ်။ ဟိုးအရင်ကတည်းကလဲ ရှိခဲ့တယ်။ နောက်လဲရှိနေဦးမှာပဲလေ။ ဝေဖန်တယ်ဆိုတာ စိတ်ဝင်စားလို့ဝေဖန်တာလေ။ အပြုသဘောဆောင်တဲ့ အကြံပေးတဲ့သဘောမျိုးလဲ ယူဆလို့ရတာပဲ။ ဘယ်လိုဝေဖန်မှုပဲဖြစ်ဖြစ် ကျွန်တော်တို့ကကြိုဆိုပါတယ်။ မြန်မာကားတွေကိုပဲဝေဖန်ဝေဖန်၊ ကျွန်တော်တို့ကားတွေကိုပဲဝေဖန်ဝေဖန်၊ ကျွန်တော်တို့ကအမြဲတမ်းဖတ်တယ်။ လေ့လာတယ်။ အဲ့ဒီထဲကမှ ဘယ်ဟာတွေက အမှန်တကယ်ပြုပြင်သင့်တဲ့အရာတွေလဲ ကျွန်တော်တို့စဉ်းစားတယ်။ ဒီအပေါ်မှာ ကျွန်တော်တို့ပြုပြင်သင့်တာရှိရင်ပြုပြင်တယ်။ လိုက်နာတယ်။

-အဲ့ဒီဝေဖန်မှုတွေနဲ့ပတ်သက်ပြီး မြန်မာ့ရုပ်ရှင်လောကက ဘာတွေဖြစ်လာနိုင်လဲ။

ဘာမှဖြစ်မလာနိုင်ပါဘူး။ ရုပ်ရှင်လောကကလဲ ဒီအတိုင်းပဲဆက်ရှိနေဦးမှာပဲ။ သူတို့တွေရဲ့ဝေဖန်မှုကို ကျွန်တော်တို့ကဖတ်ရမယ်။ လေ့လာရမယ်။ ပြင်စရာရှိရင်ပြင်ရမယ်။ ရုပ်ရှင်လောကကတော့ ဒီဝေဖန်မှုကြောင့်တော့ ကြီးမားတဲ့အပြောင်းအလဲတို့ဘာတို့တော့မရှိနိုင်ဘူးပေါ့။ ဘာလို့လဲဆိုတော့ သူ့ပရိသတ်နဲ့သူကတော့ ရှိနေပြီးသားလေ။ သူ့ပရိသတ်နဲ့သူရှိနေလို့လဲ ရပ်တည်လို့ရတာပေါ့။ ကြိုက်တဲ့သူတစ်ယောက်မှ မရှိဘူးဆိုရင်လဲ ရပ်တည်လို့ဘယ်လိုမှမရနိုင်ဘူးလေ။ ကျွန်တော်တို့ကအရေးကြီးတာက သူတို့တွေရဲ့ဝေဖန်မှုတွေကိုလေးစားရမယ်။ လေ့လာရမယ်။ ပြင်စရာရှိရင်ပြင်ရမယ်။ ကောင်းတဲ့အမြင်နဲ့ကြည့်ရင် ဒါကောင်းဖို့အတွက်လုပ်ကြတာလို့ပဲယူဆတာပေါ့။ အဲ့ဒီတော့ ကျွန်တော်တို့ကကျေးဇူးတင်ပါတယ်။

-အဲ့ဒီဝေဖန်မှုတွေနဲ့ပတ်သက်ပြီး အကောင်းဆုံးဖြစ်လာအောင် အစ်ကိုတို့အနေနဲ့ဘာတွေလုပ်ဆောင်သွားဖို့ရှိမလဲ။

အဓိကကတော့ ညီမလေးရယ်။ အရှင်းဆုံးပြောရရင် သူ့အခြေအနေနဲ့သူ့အချိန်အခါနဲ့လောကကြီးမှာ အရာအားလုံးကသူ့အိုးနဲ့သူ့ဆန်တန်ရာတန်ရာဖြစ်နေကြတာပဲလေ။ အစ်ကိုတို့ကမြန်မာပြည်မှာမွေးပြီးတော့ ဟောလီးဝုဒ်လောက်ကြီး တိုးတက်ချင်လို့တော့ ဘယ်လိုနည်းနဲ့မှမဖြစ်နိုင်ဘူး။ အဲ့ဒီတော့ အရေးကြီးဆုံးက အစ်ကိုတို့တိုင်းပြည်က သူများတိုင်းပြည်တွေနဲ့ရင်ဘောင်တန်းလာနိုင်အောင် အမှီလိုက်လာနိုင်အောင် အစ်ကိုတို့ကကြိုးစားကြရမယ်။ ကိုယ့်ကိုကိုယ်ပြုပြင်ရမယ်။ ကိုယ်တိုင်းပြည်ကို ကိုယ်တည်ဆောက်ကြရမယ်။ တိုင်းပြည်ရဲ့စီးပွားရေး၊ လူမှုရေး ၊ ပညာရေး အစစအရာရာပေါ့။ မြင့်မားလာမှပဲ ဒီနိုင်ငံထဲမှာရှိတဲ့ ကဏ္ဍအသီးသီးက ဖက်စုံထောင့်စုံတိုးတက်လာမှာပါ။ မြန်မာပြည်မှာမွေးတဲ့ သူတစ်ယောက်က ဘောလုံးမှာပဲကြည့်မယ်ဆိုရင် အင်မတန်ကိုကြိုးစားပမ်းစားလေ့ကျင့်ပြီးတော့မှ နိုင်ငံတကာနဲ့အစ်ကိုတို့ယှဉ်လို့ရမယ်လေ။ ဘရာဇီးမှာ မွေးပြီးတော့ကြီးတဲ့ သူကတော့ တော်ရုံတန်ရုံရပ်ကွက်အဆင့်လောက်ကန်တာကိုက အစ်ကိုတို့ဆီက လက်ရွေးစဉ်လောက်ဖြစ်နေမှာပဲလေ။ အဲ့ဒီတော့ အစ်ကိုတို့တိုင်းပြည်ကိုအရင်ကောင်းအောင် တည်ဆောက်ရမယ်။ တိုင်းပြည်ကောင်းမှ တိုင်းပြည်ထဲမှာ ရှိသော ကဏ္ဍအသီးသီးက ဖွံ့ဖြိုးတိုးတက်လာမှာ အစ်ကိုတို့ ရုပ်ရှင်လောကတစ်ခုထဲကို ဖွံ့ဖြိုးပြီးတိုးတက်ပြီး  ကမ္ဘာနဲ့ရင်ဘောင်တန်းနိုင်အောင်လုပ်လို့မရဘူး။ အရေးကြီးတာအစ်ကိုတို့တိုင်းပြည်ကို တည်ဆောက်ဖို့အရေးကြီးတယ်။

-ရုပ်ရှင်လောကအနေနဲ့အဓိကရော ဘယ်လိုပြသနာတွေကိုရင်ဆိုင်နေရလဲ။

ပြသနာတွေကတော့ အစအဆုံးအကုန်ပဲ။ အဓိကက မပြည့်စုံတာ၊ လိုအပ်ချက်တွေအများကြီးရှိနေတာ ဘာတွေလိုအပ်သလဲမေးရင် ကကြီးကနေ အအထိပဲ။ အစအဆုံးလိုအပ်တယ်။ အစအဆုံးဘာကြောင့်လိုအပ်သလဲဆိုတော့ ဒီနိုင်ငံမှာ ဒီလိုမျိုးအနေအထားမှာပဲရှိနေသေးတဲ့အတွက်ကြောင့်လိုအပ်နေဦးမှာပဲ။ အဲ့ဒီတော့ တဖြည်းဖြည်းချင်းတဖြည်းဖြည်းချင်း အစစအရာရာ ပြုပြင်ပြီးပြောင်းလဲလာအောင်တည်ဆောက်ရမယ်။

-ရုပ်ရှင်လောကပြောင်းလဲလာဖို့အတွက်အစ်ကို့အနေနဲ့ဘာများတောင်းဆိုချင်တာရှိလဲ။

အဓိကကတော့ တောင်းဆိုနေရုံနဲ့လဲ ဖြစ်လာမှာမဟုတ်ဘူး။ ခုနကပြောသလို ကိုယ့်တိုင်းပြည်က သူများတိုင်းပြည်တွေနဲ့ရင်ဘောင်တန်းလာနိုင်တဲ့ အခြေအနေဆိုရင်ဒါတွေက အလိုလိုပါလာပြီး အလိုလိုမြင့်လာမှာပဲ။ အဓိကက ကိုယ့်ခွန်ကိုယ့်အားနဲ့အကောင်းဆုံးဖြစ်လာအောင်ကြိုးစားကြဖို့ပဲလိုတယ်။ အစ်ကိုတို့ဆီမှာရှိနေတဲ့ အခြေအနေနဲ့အစ်ကိုတို့ဆီမှာရင်ဆိုင်ကြုံတွေ့နေရတဲ့ အခက်အခဲကို အစ်ကိုတို့ပဲသိတယ်။ အပြင်လူတွေကိုပြောပြလို့ရှိရင်လဲ အစ်ကိုတို့နဲ့ထပ်တူထပ်မျှ ခံစားနားလည်ပေးနိုင်ဖို့ဆိုတာ မလွယ်နိုင်ဘူးလေ။ အစ်ကိုတို့မှာက စတူဒီယိုမရှိ၊ ဘာမရှိ၊ ညာမရှိဘာဆို ဘာတစ်ခုမှမပြည့်စုံပဲနဲ့တကယ့်ကို ဆင်းဆင်းရဲရဲ ချို့ချို့တဲ့တဲ့ မျက်နှာငယ်ငယ်လေးနဲ့ကားတစ်ကားလေးပြီးအောင်မနည်းကို ဖန်တီးနေကြရတာ အဲ့ဒီလိုဆိုတော့ ဘယ်နေရာမှာမှ အစ်ကိုတို့ဆီမှာ စတူဒီယိုမရှိဘူး။ ဥပမာ Actor တစ်ယောက်က သရုပ်ဆောင်တဲ့အခါမှာ အခုဆိုစတူဒီယိုမရှိတဲ့အတွက် ကားလမ်းဘေးမှာရိုက်နေရတယ်။ အဲ့ဒီတော့ကားသံတွေ ဟွန်းသံတွေကြောင့် ဒီထဲမှာရိုက်နေတဲ့ ဆင်းန်ကိုအထပ်ထပ်အခါခါပြန်ပြန်ရိုက်ရတယ်။ အဲ့ဒီလိုဆိုတော့ ဒီ mood တွေ၊ Concentration တွေကလိုသလောက် တည်ဆောက်ယူလို့ဘယ်လိုမှမဖြစ်နိုင်ဘူး။ ဘာကြောင့်အစ်ကိုတို့ဒီမှာရိုက်နေလဲ။ အစ်ကိုတို့ဆီမှာရှိမှမရှိတာ၊ အဲ့ဒီတော့ ဒီစတူဒီယိုမရှိတာတွေ၊ လိုအပ်တဲ့ပစ္စည်းမပြည့်စုံတာတွေကို ဘယ်သူ့ကိုသွားပြီးအပြစ်တင်ရမှာလဲ။ အပြစ်တင်ရင်လဲ အပြစ်ပြောနေတာပဲရှိမယ်။ အဲ့ဒီတော့အစ်ကိုတို့မှာရှိတာလေးနဲ့အကောင်းဆုံးအဆင်ပြေဆုံးလေးဖြစ်အောင်မရမကကြိုးစားပြီးအားထုတ်နေကြရတယ်။ ပရိသတ်ကလဲအရမ်းကျေးဇူးတင်စရာကောင်းတယ်။ ဒီလိုမပြည့်မစုံနဲ့ဖန်တီးထားတာလေးကိုပဲ မပြည့်မစုံနဲ့ကြည့်ပေးနေကြတယ်။ အစ်ကိုတို့ဆီမှာလိုအပ်ချက်တွေရှိတာပေါ့။ မရှိပဲဘယ်နေပါ့မလဲ။ ရှိမှန်းလဲသိတာပေါ့။ ဒါပေမဲ့လဲ လိုအပ်တဲ့ Facilities မှမရှိတာ အစ်ကိုတို့လဲဘယ်လိုလုပ်မလဲ။ အစ်ကိုတို့လဲဘယ်ဖန်တီးနိုင်ပါ့မလဲ။ သူဌေးမှမဟုတ်တာအစ်ကိုတို့လဲရတာလေးနဲ့အဆင်ပြေအောင်ရုန်းကန်နေကြရတာလေ။ အစ်ကိုတို့မှာရှိတဲ့ Facilities ကို ဟောလီးဝုဒ်မှာရှိတဲ့သူတွေကို သွားရိုက်ခိုင်းကြည့် အစ်ကိုတို့လိုကားမျိုးထွက်လာဖို့နေနေသာသာ ရူးပြီးတောင်ပြန်သွားဦးမယ်။ ဒီလိုဟာနဲ့ဒီလိုကားတစ်ကားပြီးအောင် ရိုက်တယ်ဟုတ်လားဆိုပြီး ရူးပြီးပြန်သွားမှာ။ ပြောရမယ်ဆိုရင်ဘာမှမရှိတဲ့ အနေအထားလေးနဲ့ရအောင်ရိုက်နေတာကိုက ကြံဖန်ပြီးချီးကျူးမယ်ဆိုရင်ချီးကျူးလို့တောင်ရပါတယ်။ ဒါပေမဲ့လဲ ဒီလိုအနေအထားကိုကျေနပ်နေဖို့၊ ဂုဏ်ယူနေဖို့ပြောတာမဟုတ်ပါဘူး။ အစ်ကိုတို့မှာအဆင်မပြေတဲ့ဘ၀တွေနဲ့ကြိုးစားနေရတယ်ဆိုတာကိုကိုယ်ချင်းစာစေချင်တဲ့စိတ်လေးနဲ့ရှင်းပြပြီးပြောပြတာပါ။
-အစ်ကိုအခုရိုက်နေတဲ့ ကားကြီးအကြောင်းကို အရင်ပြောပြပေးပါဦး။

အခုရိုက်နေတဲ့ကားက နာမည်အတိအကျမပေးရသေးဘူး။ ကားနာမည်က စိတ်တိုင်းမကျသေးလို့ပါ။ မင်းသမီးက ရှစ်လက်ပါတယ်။ ဒါရိုက်တာက ကိုမျိုးမြင့်ဆွေပါ။ ကျွန်တော့်ရဲ့ကာရိုက်တာက ဒီအထဲမှာစီးပွားရေးသမား အလုပ်ရှုပ်တယ်။ ကောင်မလေးတစ်ယောက်နဲ့အိမ်ထောင်ပြုဖို့စီစဉ်နေတဲ့အချိန်မှာ အလုပ်တွေကရှုပ်ပြီး သဘောထားချင်းမတိုက်ဆိုင်ဖြစ်တဲ့အခါကျတော့ ကွဲသွားတယ်ပေါ့။ အဲ့ဒီမှာ ဖုန်းတစ်လုံးရတယ်။ အဲ့ဒီဖုန်းမှာနတ်ပါလာပြီး ဖုန်းနတ်ရဲ့ညွှန်ကြားမှုတွေအောက်မှာ ဖြစ်ပျက်လာတဲ့ ဇာတ်လမ်းမျိုးလေးပေါ့။ ဇာတ်လမ်းကတော့ နည်းနည်းဆန်းတယ်။ ရိုက်နေကျဇာတ်လမ်း၊ မြင်နေကျဇာတ်လမ်းမျိုးမဟုတ်ဘူးပေါ့။

-ဒီကားပြီးရင်ဘာကားဆက်ရိုက်ဖို့ရှိဦးမလဲ။

ကိုဝိုင်းနဲ့၁၅ ရက်နေ့စရိုက်မယ်။ လိပ်ပြာထောင်ချောက်တဲ့။ ဖွေးဖွေးနဲ့ပါ။ အဲ့ဒီကားက ဆိုက်ကိုကားပေါ့။

-ထိုင်းရုပ်သံတစ်ခုကလဲ အစ်ကို့ကိုဇာတ်လမ်းတွဲကမ်းလှမ်းတယ်လို့သိရတယ်။ အဲ့ဒါကရော ဘယ်လိုအခြေအနေရှိလဲ။

အဲ့ဒါကတော့ အစ်ကိုတို့နဲ့လက်တွဲပြီးလုပ်ခဲ့တဲ့ Channal 3 ကပါပဲ။ TT & Donut ဇာတ်လမ်းကိုပဲ ဇာတ်လမ်းအရှည်ပြန်ချဲ့ပြီး ဇာတ်လမ်းတွဲပုံစံရိုက်ချင်တာပေါ့။ အဲ့ဒါကတော့ အားလုံးတိုင်ပင်ညှိနှိုင်းရပါဦးမယ်။

-ဒီရဲ့အရှေ့မှာလဲ မအူဝဲနဲ့ကြော်ငြာသွားရိုက်တာတွေ့ရတယ်။ အဲ့ဒါလေးကိုလဲပြောပြပေးပါဦး။

ဟုတ်တယ်။ အဲ့ဒါကအစ်ကိုတို့ မန္တလေးမှာ Amazing Mall ဆိုတဲ့ ဟာလေးသွားရိုက်တာပေါ့။ အဲ့ဒီပိုင်ရှင်တွေကလဲ အစ်ကိုတို့နဲ့မိသားစုလိုဖြစ်နေတယ်။ သူတို့ကနေ အိမ်တွင်းအသုံးအဆောင်ပစ္စည်းတွေဥပမာ အိပ်အခင်းတို့၊ ကုတင်တို့နောက်အိမ်ထဲမှာရှိတဲ့ Decoration တွေကို Mall ပုံစံလေးဖွင့်လို့အဲ့ဒီအတွက်ကြော်ငြာသွားရိုက်ပေးတာပါ။

--သုဒြာထုတ်လုပ်ရေးကရိုက်မဲ့ကားမှာ အစ်ကိုပါမယ်လို့လဲသိရတယ်။

အစ်ကိုပါမဲ့ကားကစီတော့စီစဉ်နေတာပဲ။ ဒါပေမဲ့ကိုယ်ကုမ္ပဏီထက်စာရင်အပြင်ကပရိုဂျူဆာတွေကိုဦးစားပေးနေရတဲ့အခါကျတော့လေ အစ်ကို့ရိုက်ရက်ကအစ်ကို့ကုမ္ပဏီအစ်ကိုပြန်မပေးနိုင်သေးဘူးဖြစ်နေတာပါ။ နည်းနည်းကြာဦးမယ်ထင်တယ်။

-သီတင်းကျွတ်ကရော ဘယ်မှာရှိမလဲ။

မသိသေးပါဘူး။ အိမ်မှာပဲရှိမယ်ထင်ပါတယ်။ သီတင်းကျွတ်ရင်လူကြီးမိဘတွေကိုလိုက်ကန်တော့မယ်။ ကောင်းမှုကိုသိုလ်လေးလုပ်မယ်။ ဒီလောက်ပါပဲ။

-အစ်ကို့ကိုအားပေးနေတဲ့ပရိသတ်အတွက်ရော ဘာများပြောချင်သေးလဲ။

အကောင်းဆုံးဖြစ်အောင်တော့အမြဲတမ်းကြိုးစားနေပါတယ်။ အစွမ်းရှိသလောက်လေးပေါ့။

trend myanmar မှ ကူးယူဖော်ပြသည်။
www.myanmarbookworld.com